Pornhubன் கறுப்பு பக்கம்: சிதைக்கப்படும் சிறுமிகள்

 ஒரு நாள் தன் 15 வயது மகளைக் காணாமல் ஒரு அம்மா தவித்துப் போயிருந்தார், எங்குத் தேடியும் கிடைக்கவில்லை. காவல்துறையில் புகார் கொடுத்தும் பயனில்லை. பல மாதங்கள் கழித்து ஒரு நாள் தெரிந்த நபர் தன் அலைப்பேசியில் சில காணொளிகளை அந்த அம்மாவிடம் காட்டினார். அதில் இருப்பது நிச்சயம் தன் மகள் தான் என்பது அந்த அம்மாவிற்குத் தெரிந்துவிட்டது. அந்த காணொளிகள் போர்ன்ஹப் எனும் வலைத்தளத்தில் இருந்தது. அதில் அந்த சிறுமி கொடூரமாக கற்பழிக்கப்படும் சுமார் 50 காணொளிகள் இருந்தன…

போர்ன்ஹப்(Pornhub) உங்களில் பல பேருக்குத் தெரிந்திருக்கும், தெரியாதவர்களுக்கு இது ஒரு செக்ஸ் படங்களைக் காட்டும் வலைத்தளம். பொழுதுபோக்கிற்கு  எப்படி யுட்யூபோ, படங்கள் பார்க்க எப்படி நெட்ப்ளிக்ஸ் அது போல் செக்ஸ் படங்களைப் பார்க்க போர்ன்ஹப் வலைத்தளம்.

அண்மையில் இந்த வலைத்தளம் பல சர்ச்சைகளில் சிக்கிக் கொண்டிருக்கிறது குறிப்பாகச் சிறுவர் பாலியல் காணொளிகள் தொடர்பான சர்ச்சைகள்.

9 வயது முதல் 17 வயது வரையிலான சிறுமிகள் மற்றும் வயதுவந்த பெண்கள் கற்பழிக்கப்படும் காணொளிகள், ஒருவரின் அனுமதியில்லாத அந்தரங்க காணொளிகள், புகைப்படங்கள் இந்த வலைத்தளத்தில் குவிந்துள்ளது. சிறுவர் பாலியல் மற்றும் பெண்களுக்கு எதிரான பாலியல் குற்றங்கள் அதிகரிக்க இந்த தளம் பெரும் காரணமாகி வருகிறது. 

இதைப் பற்றி இனி விரிவாகப் பார்ப்போம்.

போர்ன்ஹப் வலைத்தளம் ஒரு மாதத்திற்கு சுமார் 35 கோடி முறை பார்க்கப்படுகிறது -இது நெட்ப்ளிக்ஸை விட அதிகம். இந்த வலைத்தளத்தில் ஒரு நாளைக்கு சுமார் 30 கோடி முறை விளம்பரங்கள் காட்டப்பட்டு அதன் மூலம் பணமீட்டப்படுகிறது. இந்த தளத்தில் ஒரு பயனாளர் வீடியோவை பதிவேற்றம் செய்துவிட முடியும், அதனால் அவர் பணம் சம்பாதிக்கவும் முடியும்.  ஒரு வருடத்திற்கு சுமார் 13 லட்சம் மணிநேர வீடியோக்கள் புதிதாக பதிவேற்றம் செய்யப் படுகிறது.போர்ன்ஹப் வலைத்தளம் பெரும்பாலும் இலவசம், சில வீடியோக்கள்  மட்டும் தான் காசு கொடுத்துப் பார்க்க முடியும். பல லட்சம் வீடியோக்கள் இலவசமாக உள்ளது.

உண்மையில் நீங்கள் தொடர்ந்து செய்திகளைப் படிப்பவராக இருந்தால் போர்ன்ஹப் பற்றிய நல்ல செய்திகளைத் தான் கேட்டிருப்பீர்கள். போர்ன்ஹப் பல சமூக உதவிகளைச் செய்து வருகிறது, நன்கொடை கொடுக்கிறது. கொரோனா காலத்தில் தம் வலைத்தளத்தை இலவசமாக்கியது. இந்த வலைத்தளத்தின் வருமானத்தைப் பற்றித் தெரிந்து கொள்ள வேண்டுமென்றால் ஒரு உதாரணம், நியூயார்க் நகரில் உள்ள டைம்ஸ் சதுக்கத்தில் இந்த தளத்தின் விளம்பரங்கள் வரும். அங்கு சில நொடி விளம்பரம் காட்ட நீங்கள் கோடிகளைக் கொடுக்க வேண்டும். தொடர்ந்து விளம்பரம் வருகிறதென்றால் புரிந்துகொள்ளுங்கள்.

ஆனாலும் இந்த வலைத்தளத்திற்குத் தீராத கறுப்பு பக்கம் ஒன்றுள்ளது. அதை அடுத்த கட்டுரையில் பார்ப்போம்…